CSAG Viva

Santiago, 15.2.2026.-  A terra do viño de Monterrei, das augas de Cabreiroá e dun dos Entroidos máis emblemáticos de Galicia convértese este domingo no escenario dunha nova entrega de ‘A miña gran cidade’, o programa de entretemento da TVG presentado por Noelia Rodríguez.

Nesta ocasión a anfitrioa será unha cara moi coñecida para a audiencia galega, Esther Estévez, que recibirá en Verín o cantante aragonés Juanjo Bona, un novo talento da música que se deu a coñecer nun importante concurso televisivo e que destaca polo seu compromiso coa tradición musical da súa terra.

Durante 24 horas, Esther tratará de convencer o seu convidado de que Verín é o destino perfecto para pasar uns días de vacacións. Para logralo, preparoulle un percorrido cheo de experiencias: un paseo polas rúas da vila para coñecer de preto o rei do Entroido verinés, o cigarrón; un xantar no restaurante Regueiro da Cova; un encontro coa música tradicional, xunto ao seu grupo de gaitas, e unha visita aos históricos mananciais de Cabreiroá.

Coa limitación dun bono dunha hora para investir nas actividades que máis poidan sorprender ao seu visitante, a anfitrioa xogará todas as súas cartas para conquistar a Juanjo Bona. Ao remate da xornada, o artista deberá tomar a decisión final: quedar a gozar de Verín ou coller o billete de volta.

Santiago, 13.02.2026.-     A voz de Marcial Mouzo soará por última vez este sábado á noite desde o estudio do programa ‘Pensando en ti’, na Radio Galega. O veterano e querido comunicador despídese así da audiencia e inicia unha nova etapa tras 41 anos de traxectoria na emisora pública galega.

‘Pensando en ti’ leva en antena desde 1996 e está consolidado como o programa líder das madrugadas en Galicia. Emitido en directo de luns a venres, entre a 1:00 e as 6:00 horas, converteuse durante todo este tempo nun espazo de referencia para milleiros de persoas que atoparon nel compañía, diálogo e escoita activa nas horas máis silenciosas do día.

Ao longo destas décadas, o programa acompañou xeracións de galegas e galegos que traballan ou permanecen espertos durante a noite: desde fogares, rúas, taxis e camións ata panaderías e outros oficios nocturnos. As historias persoais, confidencias e conversacións compartidas fixeron de ‘Pensando en ti’ moito máis que un espazo radiofónico: unha auténtica comunidade de oíntes.

Baixo a dirección e condución de Marcial Mouzo, ese vínculo medrou ata converterse nun fenómeno social que transcendeu as ondas. Durante anos, milleiros de seguidores participaron nos tradicionais encontros de verán organizados arredor do programa, a Romaría do ‘Pensando en ti’, reforzando unha relación próxima e duradeira que marcou unha etapa singular na historia da radio en Galicia.

O ‘Pensando en ti’ tamén foi e é moito máis que un programa de radio de acompañamento e de escoita, é un programa que foi referencia en momentos informativos que fixeron historia con conversas con protagonistas que chamaban desde todas partes do mundo, como foi o caso, por exemplo, dos atentados do 11-S en Nova York.

‘Pensando en ti’ continuará en antena de luns a venres, de 1:00 a 6:00, coa condución de Pepe Capelán. Pola súa parte, Marcial Mouzo seguirá ligado á Televisión de Galicia a través do programa ‘Quen Anda Aí?’, iniciando agora un merecido descanso nas noites tras máis de tres décadas acompañando a audiencia na madrugada. 

Santiago, 13.02.2026.-    Os afeccionados ao fútbol teñen onde escoller esta fin de semana nos medios públicos galegos, cunha completa axenda de retransmisións das categorías dependentes da Federación Española de Fútbol. 

O sábado, a partir das 18:30 h no Heliodoro Rodríguez López, os espectadores da G2 vivirán o enfrontamento entre dous recentemente descendidos da Segunda División e que están programados para volver canto antes ao fútbol profesional. O Tenerife é o líder sólido do grupo primeiro da Primeira RFEF, mentres que o Rácing de Ferrol non acaba de atopar o seu sitio, pero só está a un punto da zona de promoción. 

O domingo é o día reservado pola plataforma AGalega.gal para emitir de xeito exclusivo a xornada galega do grupo primeiro da Segunda Federación. A partir das 12:00 h, o campo da Ribela será o punto de directo para seguir o Sarriana-Ximnástica Segoviana. Xa ás 17:00 h, e no formato multifútbol, os espectadores poderán seguir desde As Eiroas o Bergantiños de Carballo-Raio Cantabria e desde o Vao, o Coruxo-Valladolid Promesas.

A información deportiva, nas redes sociais

Cada fin de semana, o equipo de Deportes da Televisión de Galicia reforza a cobertura das redes sociais para ofrecer toda a información nas contas de En Xogo en X, Instagram e Facebook, ademais da plataforma G24.gal. Esta fin de semana, os reporteiros vivirán cos afeccionados os partidos do Celta en Cornellá ante o Español e do Deportivo en Castalia ante o Castellón. Tamén disporán de todos os resumos do fútbol profesional e das categorías da RFEF.

‘En Xogo’
                          
O domingo, ás 22:25 h, a G2 presenta unha nova entrega do programa ‘En Xogo’, con todos os resumos da xornada de fútbol comentados polos ex xogadores Roberto Lago e Dani Mallo, xunto ao colexiado Xabier Rodríguez Campos. Gustavo Varela repartirá xogo durante 90 minutos, nun espazo que se pode ver tamén despois da medianoite pola primeira canle da TVG.

Deportes nos Telexornais      

Os informativos ‘Bos Días’, ‘Telexornal Mediodía’ e ‘Telexornal Serán’ reservan amplos espazos para a xornada deportiva. Xunto ao fútbol, tamén estarán presentes as informacións de baloncesto, cos partidos con presenza galega nas ligas ACB, Federación e Feminina. A volta do fútbol sala será outro dos argumentos, coa visita do Noia a Peñíscola e o enfrontamento do Parrulo Ferrol contra o Santa Coloma. No balonmán haberá seguimento do Cangas-Nava, da Liga Asobal, e das saídas dos equipos galegos na competición feminina: Elda-Porriño e Beti Onak-Guardés. 

Santiago, 13.02.2026.-    Xabarín.gal continúa ampliando a súa oferta audiovisual infantil. Nas últimas semanas incorporáronse novos capítulos de ‘Maddie e Triggs’ e xa están dispoñibles ao completo as series ‘Sonic Boom’ e ‘Ladybug’, consolidando unha proposta variada e de calidade para o público máis novo.

Coincidindo co Entroido e cos días de vacacións que se aveciñan para os pequenos da casa, a plataforma reforza a súa aposta polo contido infantil diverso e educativo con varias estreas. A primeira delas será este mesmo venres, cando chega a Xabarín.gal, ao completo, a serie ‘Preparado, Eddie, xa!’. Eddie é un neno de seis anos con trastorno do espectro autista que, no seu día a día, aprende a afrontar situacións cotiás coa axuda da imaxinación, adquirindo ferramentas e recursos para comprender mellor o mundo que o rodea.

O luns 16 estrearanse os nove primeiros capítulos da nova serie ‘Os Bolechas, sabes unha cousa?’, en que estes coñecidos personaxes descobren a evolución da vida na Terra, a historia da humanidade e os animais que habitan o planeta, así como o mundo que non se ve a simple vista. A serie promove valores universais e hábitos de vida seguros e saudables, abordando tamén cuestións como as normas de convivencia, a importancia da hixiene ou a xestión das emocións.

Ao día seguinte, martes de Entroido, incorporaranse ao catálogo de Xabarín.gal cinco novos capítulos das populares series ‘Doraemon’ e ‘Shin Chan’, mentres que o venres 20 de febreiro engadiranse dez novas entregas ás aventuras do coñecido equipo de ‘A patrulla canina’.

Unha semana despois, o venres 27 de febreiro, a plataforma infantil da CSAG estreará a comedia familiar ‘Bernard’, protagonizada por un oso polar torpe e algo egoísta que percorre o mundo vivindo situacións inesperadas. Mesmo as tarefas máis sinxelas poden converterse nun grande enredo ao seu carón, ofrecendo historias cheas de humor para toda a familia.

Con estas incorporacións, Xabarín.gal reafirma o seu compromiso cunha programación infantil de calidade, inclusiva e adaptada aos intereses das novas xeracións.

Santiago, 12.2.2026.-   A fin de semana do Entroido chega cunha axenda deportiva completa. O venres, a partir das oito e media do serán, Roberto Carlos Carballo abre a semana de ‘Galicia en goles’ analizando todo o calendario que irá desenvolvendo durante o sábado e o domingo na FM da Radio Galega e na plataforma AGalegaAudio.gal.

O sábado, o programa adianta o comezo ás dúas menos cuarto da tarde para contar desde Cornellá o partido da Primeira División entre o Español e o Celta. O equipo vigués viaxa a Barcelona co obxectivo de recuperar os puntos perdidos ante o Osasuna en Balaídos. O rival non atravesa polo mellor momento da temporada, foi goleado o luns en Vilarreal, suma catro derrotas consecutivas e así e todo continúa en postos europeos. 

Durante o sábado, a Primeira Federación estará presente en tres estadios, con atención especial á visita do Rácing de Ferrol ao Rodríguez López para medirse co líder, o Tenerife. Mentres, o Pontevedra defende o terceiro posto no Príncipe Felipe ante o Cacereño e o Ourense recibe o Mérida no Couto, que volve estar en condicións tras sementar o terreo de xogo cun novo céspede. Ademais haberá cobertura á Primeira F, co enfrontamento en Riazor entre o Deportivo da Coruña e o Sevilla. As coruñesas golearon a domicilio o Madrid C. F. e viven un momento doce do curso, o que lles permitiu ter practicamente selada a permanencia na elite unha temporada máis.

O baloncesto tamén chamará á porta do ‘Galicia en goles’, coa Liga ACB no Tenerife-Breogán e a Primeira Federación no Paco Paz co Ourense-Estudiantes. Antes do paro de dúas semanas, o equipo que prepara Luis Casimiro xoga ante o sétimo clasificado, do que o separan tres vitorias. Mentres, os das Burgas afrontan un dos compromisos máis complicados do curso, recibindo o histórico cadro colexial que ocupa a cuarta praza e semella ter descartado o ascenso directo.

Xa o domingo, a edición matinal principia ás doce do mediodía co seguimento á Primeira RFEF en Balaídos, onde o Celta Fortuna recibe o Avilés. Tamén haberá cobertura para Segunda RFEF na Ribela, co Sarriana-Segoviana, e no fútbol sala de Primeira desde A Malata, onde O Parrulo Ferrol retoma a competición fronte ao Santa Coloma. A partir das dúas e cuarto, o fútbol da Federación estará presente no Anxo Carro, co Lugo-Guadalaxara; no Vao, co Coruxo-Valladolid Promesas, e nas Eiroas, co Bergantiños-Raio Cantabria. O balonmán tamén marcará a axenda da xornada, co Cangas-Nava desde o pavillón do Gatañal.

A partir das oito do serán, Castalia será o punto de directo co enfrontamento na Segunda División entre dous firmes candidatos ao ascenso á Primeira División, o Castelló e o Deportivo da Coruña. O equipo local é segundo, con 45 puntos, mentres os herculinos ocupan a terceira posición con dous puntos menos. Desde unha hora antes, Javi Torres contará a previa máis completa e a emisión prolongarase ata as doce da noite para escoitar a comparecencia do adestrador Antonio Hidalgo e dos futbolistas máis destacados sobre o terreo de xogo.

Santiago, 9.2.2026.-  AGalega.gal afronta os vindeiros días cunha programación marcada polo Entroido e por importantes novidades no seu catálogo. A plataforma acaba de estrear unha nova sección especial dedicada a esta celebración, en que se recompila toda a actualidade do Entroido 2026, xunto cunha ampla selección de pezas divulgativas sobre as súas tradicións máis singulares. Este espazo actualizarase a diario con novos contidos, reportaxes e materiais especiais, converténdose nun punto de referencia para vivir e coñecer en profundidade unha das festas máis representativas da cultura galega.

No ámbito da ficción internacional, o martes 10 chegará á plataforma a serie de suspense ‘Vienna Blood’, dispoñible en versión orixinal subtitulada en galego. Ambientada na Viena de comezos do século XX, a produción segue as investigacións dun novo médico discípulo de Sigmund Freud que colabora coa policía na resolución de complexos crimes, combinando os primeiros conceptos da psicanálise co método clásico policial. 

Unha das grandes apostas da semana será a incorporación, o mércores 11, do documental ‘O país dos mixtos’, que recupera a historia do Couto Mixto, territorio singular situado na raia entre Galicia e Portugal e formado polas aldeas de Santiago, Rubiás e Meaus. O filme afonda na memoria dunha comunidade con identidade propia e privilexios únicos durante máis de cinco séculos, ofrecendo unha valiosa mirada histórica e cultural sobre este enclave tan especial.

O xoves 12 será o momento para o humor galego coa estrea da webserie ‘Galicia crime’, protagonizada polo detective Dowson e o sarxento Pillei, dous peculiares policías de Carballork que combaten o crime nunha Galicia disparatada e americanizada. Ese mesmo día incorporarase tamén á carta o programa ‘Somos animais’, tras a súa emisión na TVG.

Outra cita destacada será o luns 16 coa chegada de ‘CeibaRimas. O freestyle en galego existe’, un programa especial en catro capítulos que recolle a gran final da principal competición de rap improvisado en galego, con batallas, actuacións e entrevistas que amosan a forza da cultura urbana galega.

A programación complétase con novas estreas cinematográficas, que estarán dispoñibles durante 30 días: o venres 13 chegará o thriller francés ‘Non llo digas a ninguén’, gañador de catro Premios César; o sábado 14 proporase o filme romántico de época ‘A lume lento’, e o martes 17 incorporarase o wéstern ‘O cazador de recompensas’.

Santiago, 5.2.2026.-  AGalegaAudio.gal estrea o mes de febreiro cun novo podcast: ‘Bágoas na chuvia’, un espazo sonoro dedicado ás bandas sonoras do cine que deixaron pegada na nosa memoria emocional. Un podcast de Isidro Cea para escoitar, lembrar… e sentir o cine a través da súa música. 

Inspirado na célebre reflexión de Roy Batty en ‘Blade Runner’, ‘Bágoas na chuvia’ propón escoitar a música como quen recupera lembranzas que falan do tempo, da beleza efémera e das historias ben contadas. Cada melodía é unha emoción; cada partitura, un recordo que se resiste a desaparecer. 

Cunha publicación quincenal, cada xoves Isidro Cea levará a audiencia por unha viaxe sonora a través do cine, explorando estilos, xéneros e épocas en que a música foi clave para construír emoción, identidade e imaxinario colectivo.

James Horner e as súas bandas sonoras, protagonistas este xoves

O episodio deste xoves está dedicado a un dos compositores máis recoñecibles e emocionais da historia do cine, James Horner. A través das súas bandas sonoras, o programa percorre melodías cheas de épica, tenrura e aventura, debuxando o retrato dun autor cun estilo inconfundible que marcou xeracións enteiras. Os autores do cine contemporáneo, o cine de ciencia ficción e o de fantasía completan esa viaxe.

‘Bágoas na chuvia’ é toda unha experiencia sensorial, íntima e evocadora, que convida a deter o tempo e deixar que a música leve os oíntes de volta a momentos inesquecibles da gran pantalla. Cada melodía convértese nunha emoción. Cada partitura, nun recordo que se resiste a desaparecer porque antes de que todo se perda… como bágoas na chuvia, queda a música.

AGalegaAudio.gal, a plataforma de referencia en galego

AGalegaAudio.gal é a plataforma de referencia da radio en galego en que se atopa toda a programación da Radio Galega, así como un amplo abano de podcasts, videopodcasts e contidos nativos exclusivos de humor, cine, historia, ficción, cultura, deporte, música, etc. A plataforma é gratuíta e está a disposición da audiencia desde calquera parte do planeta. Pódese descargar desde Google Play, Apple Store, Chromecast e nas principais televisións intelixentes (dispoñible para descargar en versión iOS e Android).

Santiago, 18.1.2026.-   A produción galega e a ficción internacional protagonizan as novas estreas de AGalega.gal esta semana, cun especial protagonismo para o documental galego ‘Á destra e á sinistra’, a miniserie británica da BBC ‘Efémeras’ e a webserie de humor ‘Peter Brandon’, creada e protagonizada por Pedro Brandariz. Estas incorporacións amplían a oferta de ficción, cinema e documental da plataforma, que continúa ofrecendo á audiencia todo o contido da grella da TVG.

Entre estas estreas cómpre salientar o documental galego ‘Á destra e á sinistra’ (mércores 21), que afonda na correspondencia entre Camilo José Cela e Rafael Alberti. A través deste diálogo epistolar entre dous escritores ideoloxicamente afastados, a obra ofrece unha reflexión sobre o contexto literario e social da época e rende homenaxe á literatura como espazo de encontro máis alá das diferenzas.

Outra das propostas recomendadas é a miniserie británica ‘Efémeras’ (venres 23), unha especie de carta de amor ás amizades masculinas e ao que estas significan, realizada pola BBC. Esta produción de dous capítulos, que aborda con sensibilidade e intensidade os límites da amizade, relata a historia real do novelista Andrew O’Hagan, que escribiu o libro homónimo (‘Mayflies’) despois de que seu amigo da infancia morrera aos 51 anos. Os protagonistas desta serie dramática, Tully e Jimmy, amigos de toda a vida, enfróntanse á súa proba máis dura cando Tully, enfermo terminal, decide poñer fin á súa vida en Suíza coa axuda do seu amigo. A situación complícase cando a muller de Tully descobre os seus plans e se opón firmemente á decisión.

A primeira novidade da semana chega o luns 19 coa estrea da webserie ‘Peter Brandon’, de Pedro Brandariz. Nela, o cómico galego, a piques de facer 40 anos, atravesa unha crise persoal e profesional marcada pola falta de ilusión e pola necesidade de conectar cun público máis novo. Co obxectivo de reinventarse, decide crear un novo alter ego, Peter Brandon, co que aspira a redefinir o seu humor e deixar unha nova pegada artística. 

A plataforma AGalega.gal suma, amais, novos títulos do cinema internacional. O martes 20 incorporarase o filme ‘O legado’, un drama ambientado na baía de Arcachón, en que un recoñecido ostricultor sofre un intento de asasinato que o deixa gravemente ferido. As súas tres fillas reúnense ao seu carón nun momento en que o futuro da granxa familiar, L’Héritage, queda no aire. A longametraxe estará dispoñible durante 30 días.

O xoves 22 será a quenda do thriller ‘Conspiración’, protagonizado por Jerry Fletcher, un taxista neoiorquino obsesionado coas teorías conspirativas que parecen condenalo a vivir nun mundo de fantasía. Porén, unha serie de acontecementos inesperados comezan a darlle a razón e, xunto a Alice, unha axudante do fiscal, verase envolto nunha perigosa trama que cuestiona todo o que parecía absurdo. O filme estará dispoñible durante 7 días.

E finalmente, o sábado 24 estrearase o filme ‘Pais e nais’, unha comedia dramática danesa protagonizada por Ulrik e Piv, unha parella que intenta integrarse no grupo de familias da nova escola da súa filla. O que comeza como un intento por encaixar convértese nun retrato incómodo e irónico das dinámicas sociais contemporáneas, cheas de egos, hipocrisía e inseguridades. A película estará dispoñible durante 30 días.

Con estas estreas, AGalega.gal reforza a súa programación semanal cunha oferta diversa e de calidade, sen deixar de ofrecer á audiencia todo o contido habitual da grella da TVG. 
 

Santiago, 12.01.2026.- Os clásicos do rock e do pop coas historias que hai detrás das cancións chegan a Radio Galega Música os venres ás 22:00 h. Da man de Ricardo Alonso, cada semana, o programa ‘Saúde e Rock and Roll’ levaranos de viaxe pola historia dos grandes himnos do rock a través das anécdotas e curiosidades que hai detrás dos clásicos da música rock e pop e que seguen marcando xeracións.

O espazo é xa accesible na plataforma dixital e agora tamén en Radio Galega Música os venres ás 22:00 h.

AGalegaAudio.gal é a plataforma de referencia da radio en galego en que se atopa toda a programación da Radio Galega, así como un amplo abano de podcasts, videopodcasts e contidos nativos exclusivos de humor, cine, historia, ficción, cultura, deporte, música, etc. A plataforma é gratuíta e está á disposición da audiencia desde calquera parte do planeta. Pódese descargar desde Google Play, Apple Store, Chromecast e nas principais televisións intelixentes (dispoñible para descargar en versión iOS e Android).

Santiago, 9.1.2026.-  A sobremesa da TVG estrea este luns unha nova temporada de ‘Atrápame se podes’, un dos concursos máis recoñecibles da canle, que regresa cun formato dinámico, cheo de ritmo e coa complicidade dun presentador moi querido pola audiencia galega, Rodrigo Vázquez.

De luns a venres, arredor das 15:40 horas, o comunicador ourensán ponse de novo á fronte deste concurso de cultura xeral, en que cinco concursantes compiten en roldas eliminatorias polo cobizado bote, que nesta nova etapa parte de 10.000 euros. Axilidade mental, rapidez e estratexia son as claves dun formato que mantén a súa mecánica clásica e que combina preguntas individuais e en parella para poñer a proba os coñecementos dos participantes.

En ‘Atrápame se podes’ os cinco concursantes rivalizan semanalmente nun formato composto por cinco fases. As eliminacións comezan a partir da segunda rolda e, en cada programa, só un deles logrará chegar á proba definitiva, o ‘minuto final’. Nela deberá responder correctamente cinco preguntas para optar ao bote, que irá aumentando programa a programa ata que alguén consiga gañalo. Como principal novidade, o concurso premiará con 100 euros cada resposta correcta na fase do ‘minuto final’, aínda que non se complete o reto completo. 

Durante as primeiras emisións desta nova etapa, Rodrigo Vázquez animará tamén a audiencia a participar no programa, abrindo o proceso de cásting para novos concursantes. As persoas interesadas poden inscribirse enviando unha mensaxe de WhatsApp ao número 618 388 087 cos seus datos de contacto.

Preto de cumprir as 1.000 emisións na súa anterior etapa na TVG, ‘Atrápame se podes’ entregou o maior premio da historia da canle pública galega, 101.800 euros, que acadou o coruñés Iván Pantín. 

Santiago, 05.01.2026.-  A Corporación de Servizos Audiovisuais de Galicia (CSAG) realiza este luns unha despregadura especial con motivo da xornada das Cabalgatas de Reis, unha das citas máis significativas do calendario festivo en Galicia, especialmente para o público infantil e familiar.

Os Telexornais do mediodía e da noite emítense hoxe en directo desde un dos puntos máis céntricos da Coruña, no Parrote, fronte á Porta Real, como parte da aposta da CSAG por levar os informativos á rúa e achegar a información á cidadanía nos grandes eventos de interese social que se viven en vilas e cidades de toda Galicia.

O ‘Telexornal mediodía’ foi presentado por Carlos Amado, mentres que o ‘Telexornal serán’ correrá a cargo de Pablo Muñoz. Emítense desde un estudio móbil de última xeración, concibido para facilitar a mobilidade dos informativos e a súa realización desde diferentes puntos do territorio galego, reforzando un modelo de medios públicos próximos, dinámicos e en contacto directo coa realidade social.

A despregadura complétase coa emisión, desde o mesmo emprazamento, do programa ‘A tarde’ da Radio Galega, presentado por Antón Rebollido, con contidos especiais vinculados ás celebracións de Reis que se desenvolven en toda Galicia. Está prevista a participación de convidados relacionados coa seguridade, a cultura, a creación artística e o ámbito infantil, así como actuacións musicais e espazos divulgativos, nunha proposta pensada para todos os públicos.  

No que vai de tempada, desde o pasado mes de setembro, a TVG levou os seus telexornais a distintos puntos do territorio galego, con emisións especiais desde Lugo, A Toxa, Ourense e Tui, coincidindo con acontecementos informativos, culturais e sociais de especial relevancia.

Santiago, 24.12.2025.-     A Televisión de Galicia prepárase para vivir unha noite máxica de Fin de Ano cunhas badaladas moi especiais. Eva Iglesias, Aitana del Mar, Arturo Fernández e Eddy Insua serán os encargados de acompañar todos os galegos na chegada de 2026, tomando as uvas en directo desde a emblemática praza do Obradoiro, en Santiago de Compostela.

Os catro presentadores, caras moi familiares da canle pública, chegan a esta cita tras conquistar os fogares galegos a través de programas tan queridos como ‘Luar’, ‘Land Rober +Show’, ‘Sala G’ ou o máis novo en chegar, ‘Pulso activo’. A súa proximidade e carisma serán os ingredientes perfectos para recibir o novo ano por todo o alto.

Un pouco antes da medianoite do 31 de decembro, Xosé Ramón Gayoso daralles paso desde o estudio da ‘Gala de Fin de Ano’ da canle, para retomar xusto despois o especial de música e festa que a TVG programa para a última noite do ano. 

Santiago, 19.12.2025.-    O presentador galego Rodrigo Vázquez regresa polo Nadal á súa casa, á Television de Galicia, na que se deu a coñecer e desenvolveu boa parte da súa carreira. Vázquez volve á Galega para presentar os especiais de Nadal de ‘Atrápame se podes’.

Desde o luns 22 de decembro, Rodrigo Vázquez  presentará de luns a venres (15:45 h), xusto antes do ‘Quen Anda Aí?’, unha edición solidaria de ‘Atrápame se podes’, en que personaxes famosos concursarán e doarán os premios a causas solidarias. Entre eles, estarán presentadores, actores e humoristas, todos rostros ben coñecidos para os espectadores da TVG. Na semana de Reis Magos os protagonistas serán nenos e nenas, nunha edición moi especial do concurso, pensada para a audiencia máis familiar.

O formato contará con cinco roldas eliminatorias con preguntas de cultura xeral e o premio dedicarase cada día a unha organización social diferente. Cada xornada poranse en xogo 1.500 euros, que se poden entregar íntegros ou acumularse parcialmente, de xeito que o bote pode ir crecendo cada día. No caso da edición infantil, os premios non serán en metálico, senón en forma de agasallos para os participantes.

Santiago, 19.12.2025.-  A retransmisión do sorteo da Lotaría de Nadal, o luns 22, dará comezo á programación especial de Nadal da Televisión de Galicia. Ás 08:30 h, e con Pablo Muñoz e Nuria Castro como presentadores, comezará un especial con ampla cobertura por toda Galicia na busca de posibles afortunados e puntos de directo no salón de lotarías en Madrid.

         Ese mesmo luns chega á pantalla a gran novidade do Nadal. Rodrigo Vázquez volve á TVG e ponse á fronte dun dos concursos máis agardados da Galega, ‘Atrápame se podes’, nunhas edicións especiais de Nadal. O concurso terá como protagonistas caras coñecidas da canle, durante as semanas de Nadal e Fin de Ano, e contará cos máis pequenos da casa durante a semana de Reis.

         Na Noiteboa, os espectadores da TVG pasarán a velada con ‘A Gran Cea’. María Mera e César Romero serán os anfitrións da noite, en que participarán os concursantes, os padriños e o xurado de ‘A Liga dos Cantantes Extraordinarios’.

         Na tarde do 25 de decembro, máis entretemento da man do espazo ‘Nadal Challenge’, no que se buscará a casa coa mellor decoración das catro provincias galegas. Media ducia de vivendas competirán por recibir o premio do programa presentado por Cristina Andrade: un cheque de 1.000 euros. E pola noite comezará un experimento musical único: ‘Sala G. O mellor dúo da historia’, un espectáculo presentado por Arturo Fernández en que os grandes nomes da música compartirán escenario co talento galego actual. Serán tres programas especiais, o 25, o día de Aninovo e o 8 de xaneiro, con dúas semifinais e unha gran final e coa participación de seis parellas musicais en cada unha delas.

         Para despedir 2025, a música dos 90 será protagonista na ‘Gala de Fin de Ano’ presentada por Xosé Ramón Gayoso e Aitana del Mar. Contará coa actuación de artistas destacados desa década como Marta Sánchez, Azúcar Moreno, Los Limones, OBK, Rebeca, La Década Prodigiosa e Los Manolos. Boris Izaguirre e Lalo Penelas, o ‘chapuzas’ do ‘Luar’, terán unha presenza destacada no programa. Esa noite, en directo e desde a praza do Obradoiro, a TVG retransmitirá as 12 badaladas coas que se lle dará a benvida ao 2026, da man de Eva Iglesias con outros tres acompañantes que se anunciarán nestes días.

         Para o serán do 1 de xaneiro, resérvase o especial ‘Nada é para sempre’, que recompilará as actuacións musicais máis emblemáticas e curiosas dos 40 anos de historia da TVG. Coa narración de Kiko Novoa, a voz das mañás da Radio Galega, os espectadores verán artistas internacionais, nacionais e galegos, e escoitarán os temas máis coñecidos dos cantantes e grupos que máis triunfaron.

         Na tarde do 5 de xaneiro, chegará a tradicional retransmisión da cabalgata de Reis, nesta ocasión desde as rúas da Coruña, nun programa que conectará tamén con outras cidades e vilas galegas. Esa noite e ao día seguinte, 6 de xaneiro, emitiranse no prime time senllas edicións especiais do reality show de baile ‘Bailamos Celebrity’, cos famosos dándoo todo na pista de baile e nunha festa en que só pode gañar unha parella.

Directos, música, humor, tradición, ilusión e solidariedade, na Radio Galega

         A Radio Galega tamén prepara unha programación especial para acompañar a audiencia este Nadal, con directos, música, humor, tradición e moita ilusión. Como no caso da TVG, as propostas para estas datas comezarán co sorteo da Lotaría e incluirán un especial de ‘Fondos Reservados’ para a Noiteboa e outro titulado ‘Saúde e rock and roll’ para o día de Nadal, que permitirá lembrar e reivindicar o espírito natalicio dos grandes roqueiros de sempre.

         Ademais, ‘Seres’, o programa da medianoite da Radio Galega, presentado por Rubén Riós, emitirá o día 24 unha edición especial realizada no comedor social da asociación Vida Digna, en Vigo, cun obxectivo claro: poñer o foco na compaña, na escoita e na dignidade, nunha noite en que ninguén debería sentirse só nin soa.

         O 30 de decembro, a ficción sonora volverá ocupar un lugar destacado coa recuperación do radioteatro en ‘Galicia por Diante’. Xa o mércores 31, a RG despedirá o ano coa retransmisión en directo das badaladas desde o Obradoiro. Finalmente, o luns 5 de xaneiro, a emisora acompañará ás Súas Maxestades de Oriente na Cabalgata de Reis da Coruña.

Máis contidos para a cativada en Xabarin.gal

         A plataforma dixital prepara estreas para este Nadal, con contidos de animación para toda a familia. A proposta especial arranca este venres coa estrea da serie ‘Os Bolechas cantan ao Nadal’, á que seguirán unha edición de Nadal das ‘Aventuras de Paddington’, ‘Betty Atómica’, ‘O abominable meniño das neves’ e ‘O neno e a besta’. A última semana do ano estará dedicada a Wallace e Gromit, cunha selección das súas curtametraxes máis emblemáticas e premiadas.

Santiago, 18.12.2025.-    Este Nadal, Xabarín.gal convértese no espazo de referencia para o entretemento familiar en galego cunha programación especial cargada de novidades pensadas para todas as idades. Xunto ás estreas destas datas, a plataforma infantil e xuvenil da CSAG lembra que toda a familia pode seguir gozando en galego de series moi populares, como ‘A patrulla canina’, ‘As aventuras de Paddington’, ‘Ladybug’, ‘As Tartarugas Ninja’, ‘Sonic Boom’, ‘Shin Chan’ ou ‘Doraemon’, dispoñibles de maneira continuada.

A programación especial arranca este venres coa estrea da serie ‘Os Bolechas cantan ao Nadal’, unha viaxe musical polas tradicións galegas destas festas. Braulio percorre diferentes puntos da xeografía para descubrir cantares de Reis e costumes populares que se manteñen vivos grazas ao labor de asociacións culturais e agrupacións musicais. Ese mesmo día ampliarase tamén a sección de músicas do Xabarín cun novo espazo dedicado ás ‘Cancións dos Bolechas cantan ao Nadal’.

O luns 22 de decembro chegará a Xabarin.gal un especial de Nadal das ‘Aventuras de Paddington’, acompañado da creación dunha sección especial de Nadal con contidos temáticos para gozar durante todas as festas. Ao día seguinte, o martes 23, estrearase a serie ‘Betty Atómica’, protagonizada por Betty, unha nena de dez anos que combina a súa vida cotiá cos deberes dunha heroína espacial. Xunto ao piloto alieníxena Sparky e ao robot X-5, forma parte dunha organización secreta que ten como misión salvar a galaxia, nunha serie chea de acción, humor e aventura.

O mércores 24 será a quenda do especial ‘O abominable meniño das neves’, unha historia baseada nun relato de Terry Pratchett que aposta pola empatía e a convivencia a través da relación entre unha avoa, o seu neto e unha sorprendente criatura das neves. Este contido emitirase tamén na G2 o día 25.

O venres 26 estrearase o filme de anime ‘O neno e a besta’, do director Mamoru Hosoda, unha emocionante historia de aprendizaxe, amizade e crecemento persoal ambientada nun mundo fantástico, recoñecida en numerosos festivais internacionais. Recibiu o premio da Academia Xaponesa á mellor película de animación en 2016.

A última semana do ano estará dedicada a Wallace e Gromit, cunha selección das súas curtametraxes máis emblemáticas e premiadas. Así, o luns 29 porase á disposición ‘A aventura espacial’; o martes 30, ‘Os pantalóns trabucados’, e o mércores 31, ‘Polos pelos’. Estas curtametraxes, que tamén se emitirán pola segunda canle da TVG en días posteriores, gañaron numerosos premios internacionais.

Xa no novo ano, o venres 2 de xaneiro, aterrará en Xabarin.gal o filme xaponés ‘Belle’, unha reinterpretación moderna de ‘A Bela e a Besta’ ambientada nun mundo virtual, que explora a identidade, o dó e a beleza interior na era dixital. Esta película recibiu múltiples premios e candidaturas en festivais en 2021 e 2022.

A programación complétase o luns 5, véspera de Reis coa curtametraxe ‘Wallace e Gromit: un asunto de pan ou morte’, unha historia chea de intriga e comedia arredor dun misterioso caso que ameaza o novo negocio de panadaría de Wallace. Candidata aos Óscar e gañadora dun BAFTA á mellor curtametraxe de animación, emitirase na G2 o día 6. 

Como última novidade, o venres 9 volverá un clásico do Xabarín: a serie ‘Sarxento Keroro’, unha comedia de animación en que unha ra alieníxena e o seu peculiar exército chegan desde o planeta Keron coa intención de invadir a Terra, pero acaban vivindo situacións tan absurdas e divertidas que a conquista queda sempre en segundo plano.

Con esta programación especial, Xabarín.gal reafirma a súa aposta por un Nadal cheo de animación, humor e historias para compartir en familia, combinando estreas destacadas con series e personaxes xa imprescindibles para varias xeracións.

Santiago, 18.12.2025.- O programa da Televisión de Galicia ‘Cos pés na terra’ recibiu este mércores en Ciudad Real o premio Compromiso coa Igualdade no Desenvolvemento Rural, na categoría de Difusión. A Asociación de Familias e Mulleres do Medio Rural (Afammer) promove estes premios anuais, cos que recoñecen o liderado feminino, o  emprendemento e a igualdade no medio rural.

      ‘Cos pés na terra’, producido por Filmax, emítese desde hai máis dunha década na TVG, onde amosa homes e mulleres que elixen a vida no campo, e vivir da terra e da vida que esta lles proporciona. Son agricultores, gandeiras, artesáns, comerciantes de madeira, hostaleiras, entre outros, que cren firmemente que hai futuro no campo.

            Pola súa a súa contribución a visibilizar a vida e os proxectos desenvolvidos no rural a través do sector audiovisual, Afammer quixo salientar a traxectoria de ‘Cos pés na terra’, espazo que está dispoñible tamén na plataforma dixital AGalega.gal. O premio foi entregado polo alcalde de Ciudad Real. Recolleuno Susana Martínez de la Riva, xefa de Produción de Filmax.

            Estes premios anuais da Asociación de Familias e Mulleres do Medio Rural salientan o valor do futuro rural, a igualdade e o emprendemento e “serven para visibilizar e poñer en valor as iniciativas que son máis necesarias na contorna rural", incidindo na importancia de apoiar proxectos liderados por mulleres para combater a despoboación e xerar oportunidades.

            Neste 2025, ‘Cos pés na terra’ foi distinguido na antesala dos Premios Mestre Mateo cun premio especial ao impulso da sostibilidade polos seus máis de 200 programas divulgando a riqueza da vida rural.

Santiago, 14.12.2025.-  A película de animación 'Decorado', dirixida por Alberto Vázquez e producida por Chelo Loureiro, Iván Miñambres, Jose Mª Fernández de Vega e Nuno Beato obtivo este sábado á noite o premio a Mellor Longametraxe de Animación dos Premios Forqué.

O filme, participado polaTelevisión de Galicia, suma este galardón aos obtidos no no 'Fantastic Fest', un dos festivais do xénero máis importantes do mundo, en Austin (Texas, EUA), e no 'Animation Is Film', de Os Ánxeles (California), posicionado como un dos encontros de animación máis importantes a escala global. A película fora tamén seleccionada en Sitges, BFI London, Tokyo, Ottawa y Abycine, entre outros festivais internacionais.

Os Premios Forqué foron entregados en Madrid nunha gala á que asistíu o equipo da cinta, ao que acompañou o director de Proxección Social da CSAG, Xaime Arias.

Dirixida por Alberto Vázquez, director de éxitos como ‘Birdboy’, ‘Psiconautas’ e ‘Unicorn Wars’ a cinta plantexa unha fábula escura e hipnótica sobre o control social e o artificio da vida. Responsable de de éxitos como ‘Birdboy’, ‘Psiconautas’ e ‘Unicorn Wars’ e gañador de catro Premios Goya, o director galego asina unha fábula escura e hipnótica sobre o control social, o artificio da vida e a fraxilidade das nosas certezas. ‘Decorado’ combina sátira, surrealismo e humor negro, cun enfoque mordaz sobre a existencia humana. O seu protagonista é un cidadán aparentemente corrente que comeza a sospeitar que todo ao seu arredor -o seu traballo, a súa parella, a súa cidade- forma parte dunha xigantesca farsa. O que parece unha paranoia cotiá convértese nunha fuxida desesperada cara a algo que se pareza, aínda que sexa un pouco, á liberdade.

Televisión de Galicia segue apostando polo cine galego e confirmando cada ano a súa participación en novos proxectos. ‘Decorado’ foi unha das películas seleccionadas na convocatoria de apoio ao cine desenvolvida no 2024. Con guión de Alberto Vázquez e Francesc Xavier Manuel, ‘Decorado’ é unha produción de Abano Producións, Uniko, The Glow, María y Arnold A.I.E e Sardinha Em Lata. O proxecto conta co respaldo de TVG, RTVE, ETB, Movistar Plus+, ICAA, Agadic, a Deputación de Badaxoz, o Goberno Vasco e a Deputación Foral de Biscaia.

Santiago, 12.12.2025.-  Os Cines Tamberlick de Vigo acolleron este xoves a preestrea de ‘Rondallas’, película apoiada pola Televisión de Galicia, que aborda este fenómeno cultural a través dunha comedia vitalista do director Daniel Sánchez Arévalo.

         A preestrea reuniu o equipo técnico e artístico da película. O produtor Ramón Campos e o reparto reuníronse de novo neste pase especial para o público galego, ao que tamén acudiron o conselleiro de Cultura, Lingua e Xuventude, José López Campos; o director xeral de Cultura, Anxo M. Lorenzo; o director da Axencia Galega das Industrias Culturais, Jacobo Sutil; e o director de Proxección Social da CSAG, Xaime Arias.

         Javier Gutiérrez, María Vázquez e Tamar Novas encabezan o reparto 100% galego da que é a sexta película de Sánchez Arévalo, quen asina tamén o guión. Nela traballaron outras coñecidas caras do cine e a televisión, como Carlos Blanco, Xosé A. Touriñán, Marta Larralde, Judith Fernández ou Fer Fraga.

            A estrea estivo precedida pola actuación da rondalla El Gran Sol, creada ex professo para esta longametraxe con músicos de diferentes agrupacións. ‘Rondallas’ chegará aos cines o día de Ano Novo.

‘Rondallas’, filmada na provincia de Pontevedra

            Despois dunha traxedia no mar, a recuperación dunha vella rondalla para competir contra as vilas veciñas preséntase como o estímulo que une toda a vila para saír adiante e recobrar a ilusión. Esta é a historia da película que foi rodada en diferentes localizacións da provincia de Pontevedra. A Guarda foi o epicentro en 2024 da súa filmación, que se estendeu tamén aos concellos de Baiona, Oia, Tui e Vigo.

Santiago, 10.12.2025.-  Estrea dobre este martes en Pontevedra, que se vestiu de gala para celebrar o cinema galego apoiado pola Televisión de Galicia.

O Museo Provincial de Pontevedra acolleu a alfombra vermella da película ‘Me has robado el corazón’, participada pola canle pública e protagonizada por Óscar Casas e Ana Jara. Os actores da cinta Antonio Pagudo, Xurxo Carreño, Lucía Veiga e Francis Lorenzo participaron tamén na estrea, nun evento ao que acudiron os produtores da película, Mamen Quintas e Julio Casal, e no que a CSAG estivo representada polo seu director de Proxección Social, Xaime Arias. Asistiron tamén o conselleiro de Cultura, Lingua e Xuventude, José López Campos; o presidente da Deputación de Pontevedra, Luis López Diéguez; e o director de Agadic, Jacobo Sutil.

Festival Novos Cinemas

Este mesmo martes, e tamén en Pontevedra, inaugurouse o Festival Novos Cinemas coa proxección no Teatro Principal da cinta ‘Liñas descontinuas’, participada pola Televisión de Galicia. A xefa de Contidos da CSAG, Montse Besada, acudiu ao pase da película. Despois da súa recente estrea mundial no Festival Internacional de clase A Tallinn Blacknights Film Festival e da estrea nacional no Festival de Xixón, o filme ten a súa estrea galega no festival pontevedrés. 
 

Santiago, 04.12.2025.-  A Corporación de Servizos Audiovisuais de Galicia (CSAG) producirá 12 novos proxectos ao abeiro da convocatoria de contidos dixitais en galego, recentemente resolta pola Comisión Directiva de Avaliación de Proxectos. Catro destes proxectos destinaranse á plataforma infantil e xuvenil Xabarín.gal, e oito incorporaranse a AGalega.gal. Cun investimento total de 339.000 euros, a CSAG impulsa novas propostas de índole divulgativa, infantil, de entretemento e de ficción, concibidas especificamente para a contorna dixital.

Na categoría de ‘Entretemento’, e cun orzamento máximo de ata 26.000 € por proxecto, foron elixidos tres proxectos: ‘Amor con interese’ de Cristela Torres Nine, un dating show que xoga cos límites entre realidade e intelixencia artificial e explora, con humor, as relacións no mundo dixital; a segunda temporada de ‘O mellor tractor do mundo’ de A revolta producións, concurso no que tractoristas galegos compiten en probas de habilidade e destreza e no que o público decide quen avanza a través das votacións ata chegar á gran final; e ‘Se non o vexo, non o creo’ de Jaime Pardo Valdés, unha serie de microespazos sobre historias tan insólitas que parecen inventadas. Cun ton humorístico e retranqueiro, o presentador percorre lugares e protagonistas para comprobar se cada caso “se sostén”. 

Na categoría de ‘Divulgación’ e tamén cun orzamento máximo de ata 26.000 € por proxecto, foron elixidos tres proxectos: ‘Club de Lectura’ de Chiripa Producións, un espazo de fomento da lectura dirixido á mocidade arredor dun club de lectura singular no que se analizan os libros obrigatorios do instituto cun enfoque fresco, contextualizado e conducido por unha comunicadora nova con gran conexión co público adolescente; ‘Camiño ao podio’ de Miramemira,S.L., serie documental que une deporte de alta competición e adolescencia. A través dos seus cinco episodios o programa segue as historias de 10 mozos e mozas do Centro Galego de Tecnificación Deportiva (CGTD) que perseguen o soño de converterse en atletas profesionais; e finalmente, a segunda temporada de ‘Sexo con senso’, de Xosé Antón Moure Ferreiro, un formato sobre educación afectivo-sexual, abordado con rigor e proximidade, no que se tratan temas clave para a saúde emocional, igualdade, afectos e relacións nun contexto onde estas cuestións comezan a recibir a atención que merecen.

No eido da ‘Ficción’, e neste caso cun orzamento máximo de ata 35.000 € por proxecto, resolveuse a selección de tres contidos: ‘Morgana en Esmelle’ de Aqueladas S. Coop. Galega, unha adaptación da obra homónima de Begoña Caamaño; ‘Hai que ir morrendo’ de Aqueladas S. Coop. Galega, unha ficción cómica na que escritoras e escritores galegos aparecen asasinados en circunstancias vinculadas ás súas novelas negras; e ‘Picariños’ de Coven Films, a segunda temporada desta serie de ficción protagonizada por un grupo de rapaces que descobre un mapa misterioso durante un campamento de verán. 

Catro novos contidos para Xabarín.gal

‘Picariños’ sumarase a outros tres proxectos destinados á plataforma Xabarín.gal, que foron seleccionados na categoría ‘Infantil’, cun orzamento máximo de ata 26.000 € cada un. Son ‘Elowa, un camiño para sentir’ de Aqueladas S. Coop. Galega, unha serie de animación creada por e para persoas autistas, pensada para axudar á identificación e comprensión das emocións a través dunha historia fantástica e respectuosa coa diversidade; ‘Nutritives’ de Henfunk Studio S.L, tamén serie de animación na que alimentos, órganos e partes do corpo teñen vida propia e resolven misterios relacionados coa saúde, a nutrición e o corpo humano cun enfoque educativo e divertido. Por último, chegará a Xabarín.gal ‘Son soniños’ de H501- Laura Pazienza Signo, un contacontos para escoitar e imaxinar pero cunha base visual sólida, a medio camiño entre a animación convencional e o conto infantil na que a Curuxa Maruxa se converte na gardiá das historias que soñan os nenos e nenas.

Os proxectos seleccionados produciranse no primeiro semestre de 2026 e posteriormente serán estreados nas plataformas dixitais Xabarín.gal e AGalega.gal