O programa 'Sala G' homenaxea este sábado os cantantes de orquestra - CSAG
O programa 'Sala G' homenaxea este sábado os cantantes de orquestra
Doce concursantes, divididos en dous equipos, deberán superar distintos retos e competirán para converterse nos reis do escenario
Santiago, 02.08.2025.- O programa ‘Sala G’ (22:05 h) lembrará hoxe os mellores tempos das salas de festas cunha entrega dedicada aos cantantes de orquestra. O programa, presentado por Arturo Fernández, é un concurso musical con moito humor onde unha ducia de concursantes, divididos en dous equipos, Os carballeiros do amor e Os intensiños da vida, terán que competir para converterse nos reis do escenario.
Entre os cantantes que participan están Pili Pampin, Noly, Laura Añón e César Romero. Todos eles deberán superar distintos retos, desde poñer a bailar toda a sala de festas a demostrar cantando o seu dominio co micrófono, mentres que o público da sala actuará de xurado e dará un veredicto final.
Ademais de Arturo Fernández como anfitrión, a ‘Sala G’ conta cun camareiro con moito humor, Fran Nogueira, e o picadiscos DJ Rokiño. A orquestra do programa é unha das mellores de Galicia: Los Satélites.