Fin de semana con traiñeiras, motocrós e fútbol na programación da G2 e AGalega.gal

Santiago, 14.08.2026.-   A segunda canle da Televisión de Galicia e a plataforma AGalega.gal retransmitirán o sábado e o domingo unha nova xornada da Liga ACT de traiñeiras, coa loita pola permanencia dos dous clubs galegos na competición como fío condutor. O Club de Remo de Ares ocupa a undécima posición da clasificación xeral con 37 puntos, empatado precisamente co Club de Remo Chapela-Wofco, décimo segundo e recentemente ascendido a esta categoría. Á fronte da táboa segue instalado o Orio Orialki, líder destacado con 145 puntos, seguido do Zierbena Bahías de Biscaia (122) e o Bermeo-Urdaibai (111).

O sábado a competición feminina comeza ás cinco e cinco da tarde e continúa desde as seis coa cita para os remeiros masculinos, desde Pasai Donibane. O domingo, a liga viaxa a Getaria, con saída ás once e cinco para a proba feminina e unha hora máis tarde para a masculina.

Tamén o domingo, a Liga Galega de Traiñeiras vive unha nova xornada en Boiro, que os afeccionados poderán seguir ás once e media en AGalega.gal e xa en diferido ás seis da tarde pola G2. Na Liga A masculina, o Cabo da Cruz mantén un dominio case incontestable tras encadear oito vitorias en nove regatas disputadas e xa mira cara ao play-off.

Motocrós desde Suecia

O Gran Premio de Suecia do Mundial MXGP de motocrós chega este domingo con dobre manga, a primeira ás dúas e a segunda ás cinco da tarde, coa emisión na G2 e en AGalega.gal. O piloto vigués Rubén Fernández (Honda HRC Petronas) ocupa a sexta posición da clasificación xeral con 446 puntos, a só catro do quinto posto que agora mesmo ostenta o italiano Andrea Adamo (450). Por diante quedan o líder Jeffrey Herlings (675), Romain Febvre (571), Lucas Coenen (566) e Tim Gajser (534).

Fútbol xuvenil 

A xornada deportiva do domingo pecha en canto as retransmisións coa final do trofeo Unindo Camiños, a partir das cinco e media da tarde, coa emisión exclusiva en AGalega.gal. O torneo vive a terceira edición e esta fin de semana desenvolve a competición de fútbol xuvenil masculino. Entre os equipos participantes destacan o Deportivo, o Celta, o Lugo, o Pontevedra e o Val Miñor, xunto ao As Palmas e o Oviedo.

Primeira xornada da Liga de Fútbol Profesional

Este sábado comeza a liga de fútbol nas categorías profesionais. O Celta Fortuna é o único conxunto galego que compite durante a fin de semana, visitando ao Cádiz no Mirandilla. Os espectadores da TVG poderán visionar o resumo do encontro en canto remate o xogo, contra as nove da noite, a través da páxina de información G24 e minutos despois no tempo de deportes do ‘Telexornal serán’. Neste espazo tamén se ofrecerán durante a fin de semana todos os goles que se produzan nos campos das dúas categorías.

Os equipos galegos de Primeira atrasan a súa estrea. O Celta-Osasuna foi adiado ao xoves 27 polo mal estado do terreo de xogo de Balaídos e o Deportivo iniciará o campionato en Riazor na noite do luns, recibindo o Elx.