Este domingo 'En xogo' dedica unha ampla despregadura aos resumos dos partidos Osasuna-Celta e Deportivo-Valladolid

Santiago, 24.10.2025.-  A última fin de semana do mes de outubro estará protagonizada polo fútbol na programación deportiva da Televisión de Galicia. O programa ‘En xogo’ chegará o domingo ás once menos cuarto da noite cos resumos máis completos dos partidos protagonizados polos dous equipos profesionais galegos. Así, o Celta de Vigo visita o Sadar de Pamplona para enfrontarse ao Osasuna e o Deportivo volve a Riazor tras dúas saídas consecutivas sen puntuar recibindo o Real Valladolid.

Sevi Martínez sentará ao seu carón na mesa de debate a Roberto Lago, Dani Mallo, Alejandro Reza, Javier Guillén e Arbiquepitas para analizar todo o que pase nos dous encontros. Despois chegará o tempo do fútbol das ligas da Federación, onde Gustavo Varela rescatará todos os goles das tres categorías.

Ademais do ‘En xogo’, os espectadores da primeira canle da Televisión de Galicia terán durante toda a fin de semana a información deportiva máis completa nas tres edicións dos telexornais: ‘Bos días’, ‘Telexornal mediodía’ e ‘Telexornal serán’.

Mentres, a G2 emitirá o sábado ás catro e cuarto da tarde o derbi galego da Primeira RFEF entre o Celta Fortuna e o Rácing de Ferrol desde o estadio municipal de Balaídos. O equipo departamental recortou distancias co líder, o Tenerife, nas dúas ultimas xornadas e o filial olívico quedou un chisco atrasado ao sumar un punto dos últimos seis posibles.
  
O sábado a plataforma AGalega.gal ofrecerá no sistema multifútbol dúas citas dos nosos representantes a partir das catro e media da tarde. No campo Arsenio Iglesias de Abegondo disputarase o partido da líder da Segunda RFEF, o Fabril, que recibe o segundo clasificado, o filial do Real Oviedo. Mentres, no Vao, haberá derbi entre o Coruxo e a Unión Deportiva Ourense.

O domingo será día dedicado ao atletismo e ao motor. Ás dez, a G2 e AGalega.gal contarán a clásica do calendario galego que percorre as rúas de Santiago de Compostela. Na sobremesa, contra as tres da tarde, ruxirán os motores dos vehículos que disputarán o último treito do rally de Catalunya, penúltima proba do Supercampionato de España.