AGalega.gal emite en directo sete concertos do festival PortAmérica

Santiago, 3.7.2025.-  A plataforma AGalega.gal ofrecerá sete concertos en directo desde o festival PortAmérica, que se celebra desde hoxe e durante a fin de semana en Azucreira de Portas (Pontevedra). PortAmérica é un dos encontros musicais máis recoñecidos do verán, cun cartel diverso, marcado pola conexión coa cultura iberoamericana, a gastronomía e o compromiso coa sustentabilidade.

A retransmisión dos concertos en AGalega.gal comeza este mesmo xoves 3, coa enerxía pop-rock da banda valisoletana Siloé, ás 20:15 horas. Xa de madrugada, ás 01:00 h será a quenda de La La Love You, un dos grupos revelación dos últimos anos no panorama indie estatal, coñecido por éxitos como ‘El fin del mundo’.

O venres 4, a emisión comezará coa actuación de Merino (18:45 h), prometedora banda madrileña de pop, e ás 20:00 h será a quenda da asturiana Marisa Valle Roso, unha das voces máis recoñecidas do novo folclore da súa terra, que fusiona con pop e electrónica. 

A noite pecharase coa actuación estelar de Love of Lesbian (23:15 h), banda de referencia no indie-pop español, que regresa a Galicia cun repertorio cheo de himnos.

O sábado 5 de xullo, a plataforma AGalega.gal ofrecerá dous directos máis: ás 18:00 h, Carla Lourdes, unha das voces emerxentes do pop español, e ás 20:00 h, Travis Birds, compositora madrileña cuxa música se caracteriza por melodías envolventes, letras profundas e unha voz con personalidade.