A serie documental da TVG 'Curando o mundo', co cirurxián Diego González Rivas, recibe o Premio Medicina Siglo XXI - CRTVG
A serie documental da TVG 'Curando o mundo', co cirurxián Diego González Rivas, recibe o Premio Medicina Siglo XXI
O programa, dispoñible en AGalega.gal, amosa como o recoñecido médico coruñés percorre o planeta ensinando a súa técnica minimamente invasiva para operacións de pulmón
Santiago, 03.04.2025.- O programa da Televisión de Galicia ‘Curando o mundo’ foi galardoado nos Premios Medicina Siglo XXI 2025, que se entregaron nunha gala celebrada en Madrid este mércores á noite. O premio, concedido no apartado de comunicación, foi recollido polo director de Proxección Social da CRTVG, Xaime Arias.
‘Curando o mundo’ é unha serie documental en que o cirurxián coruñés Diego González Rivas, que está a revolucionar a cirurxía torácica, percorre o mundo ensinando a súa técnica minimamente invasiva para operacións de pulmón. González Rivas, un dos médicos máis recoñecidos do mundo, é creador e referente mundial da técnica UniportalVATSeRats, coa que operou xa máis de 7.000 pacientes en 129 países. En cada lugar que visita, os espectadores poden adentrarse en como xestiona o choque cultural, o tratamento da morte e da esperanza ou as condicións de vida.
A Televisión de Galicia estreou o pasado outono o programa ‘Curando o mundo’, que está dispoñible en AGalega.gal, a plataforma dixital dos medios públicos galegos.
Os Premios Medicina Siglo XXI, organizados por El Suplemento, teñen como obxectivo recoñecer e promover a excelencia no ámbito sanitario, destacando o labor de profesionais e entidades que contribúen ao avance da medicina en España.