A CRTVG presentou este venres en Santiago a súa nova serie para o público xuvenil 'Os argonautas' - CRTVG
A CRTVG presentou este venres en Santiago a súa nova serie para o público xuvenil 'Os argonautas'
Participada pola TVG e deseñada para nenos de 8 a 12 anos, estrearase en exclusiva en galego na nova plataforma dixital da Corporación
Son 20 entregas dunha historia de aventuras e amizade que narra as peripecias de verán dunha banda de amigos e está inspirada en grandes clásicos xuvenís
Santiago, 12.01.2023.- A CRTVG presentou este venres en Santiago de Compostela a súa nova ficción de aventuras para o público infantil e xuvenil, ‘Os argonautas e a moeda de ouro’, nun acto no auditorio Abanca. Destinada a rapaces de 8 a 12 anos, a serie estrearase na nova plataforma dixital dos medios públicos, en que quedará dispoñible para o consumo á carta. Esta plataforma dixital entrará en funcionamento este mes de xaneiro.
Escolares de primaria e secundaria gozaron hoxe do primeiro episodio da serie nunha proxección en Santiago. Coñeceron os cinco amigos protagonistas, Alba, Lucas, Sali, Olivia e Nil, que viven un emocionante verán nunha vila mariñeira (Laxe, A Coruña), enfrontándose a perigos e descubrindo o valor da amizade. A produción inspírase en grandes clásicos literarios e cinematográficos coma 'The Breakfast Club' ou 'The Goonies', adaptándoos aos cativos do século XXI.
Dirixida por Toño López e Lucía Estévez, ‘Os argonautas e a moeda de ouro’ é unha ficción integradora, con nenos de realidades diversas. O elenco está composto, entre outros, por Eva Fernández, Xosé Antonio Touriñán, Víctor Mosqueira, Denis Gómez, César Cambeiro, Federico Pérez e os mozos Aliyah Fidalgo, Sarela Montes, Brais Sixto, Claudia Pujaldes, Juan Rodríguez, Lúa Varela e Xoel Río.
TVG participa nesta ficción coproducida por RTVE e a produtora galega Portocabo, e que conta ademais co apoio do Hub Audiovisual da Xunta de Galicia financiado polo Fondo Europeo de Desenvolvemento Rexional (FEDER) dentro do Eixo REACT-UE.
Primeiro capítulo: o inicio do verán
A serie arranca coa chegada de Alba á vila de pescadores Rodas para pasar as vacacións na casa da súa tía Helena. Aínda que agarda un verán aburrido e solitario, pronto fará novos amigos: Lucas, Sali, Olivia e Nil. Xuntos farán un descubrimento extraordinario: atoparán unha moeda de ouro da época romana. O descubrimento levaraos ao rastro dun tesouro, aínda que, polo camiño, se atoparán con poderes escuros, encabezados por Nina, que quere construír unha urbanización de luxo na cidade, que tratarán de facelos fracasar. E mentres unen forzas, descubrirán que a súa amizade é máis forte que todos os obstáculos que poidan atopar.
‘Os argonautas e a moeda de ouro’ / Ficha técnica
⦁ Xénero: Kids live action
⦁ Episodios e duración: 20 x 22 minutos
⦁ Creada por: Jose Rubio e Alfonso Branco
⦁ Produción executiva: Alfonso Blanco (Portocabo) e Borja Gálvez (RTVE)
⦁ Dirección: Toño López e Lucía Estévez
⦁ Guión: José Rubio, Alexis Barroso, Sara Gómez, Carlota Dans, Nina Hernández, Nano López Moure e Manuel Darriba
⦁ Dirección de produción: Paula Fernández
⦁ Dirección de fotografía: Lucía C.Pan
⦁ Música orixinal: Santi Jul e Iván Laxe
⦁ Dirección de arte: Andrea Pozo
⦁ Edición: Lu Rodríguez