Estrea especial no Día das Letras de 'O corpo aberto', premiada longametraxe de terror participada pola TVG

Santiago, 17.05.2025.-  Televisión de Galicia estrea o Día das Letras Galegas a multipremiada ‘O corpo aberto’, película dirixida por Ángeles Huerta e participada pola TVG, que parte dun relato de Xosé Luis Méndez Ferrin (‘Lobosandaus’, en Arraianos) para crear unha longametraxe definida como de ‘terror folk’, que combina o xénero de terror e o drama rural, e sorprende pola súa feitura técnica e atmosfera envolvente. 

A trama da película aborda a crenza popular galega das almas errantes na busca de corpos que habitar. Ao tempo que un mestre novo chega a Lobosandaus, unha aldea inhóspita e de tradicións ancestrais, o falecemento dun veciño libera un espírito que busca continuar a súa existencia entre os vivos. Dan vida a esta inquietante historia un elenco encabezado por Tamar Novas, María Vázquez, Victoria Guerra, José Fidalgo, Federico Pérez, Miquel Ínsua e Elena Seijo. 

Cómpre salientar tamén o protagonismo que adquire na película a banda sonora, creada por Mercedes Peón, así como a potencia visual das localizacións na zona da Raia, entre os concellos de Muíños, Lobeira, Calvos de Randín, Tourme e Pitoes. 

‘O corpo aberto’, cinta triunfadora nos Premios Mestre Mateo de 2023, é unha coprodución entre a galega OlloVivo, a catalá Fasten Films e a portuguesa Cinamate, co apoio da TVG, Agadic, ICAA, e RTVE.