A xornada futbolística comeza este venres na G2 e AGalega.gal co Celta Fortuna-Barcelona B, duelo de filiais na Primeira RFEF - CRTVG
A xornada futbolística comeza este venres na G2 e AGalega.gal co Celta Fortuna-Barcelona B, duelo de filiais na Primeira RFEF
Na fin de semana destacan os partidos Fabril-Bergantiños, Ourense C. F.-Zamora e Compostela-Salamanca, o derbi galego de fútbol sala feminino entre o Poio e o Ourense e o Mundial de Motocrós desde Sardeña
Santiago, 04.04.2025.- A G2 e AGalega.gal abren este venres a xornada futbolística da fin de semana desde o estadio municipal de Balaídos. Ás 20:30 h, o Celta Fortuna e o Barcelona B disputan un derbi de filiais, con urxencia para o segundo equipo azulgrá, obrigado a gañar para fuxir dos postos de descenso directo. Mentres, o cadro olívico acaba de sumar dúas vitorias consecutivas que lle permiten respirar na zona media da clasificación. A disputa o martes da próxima semana do España-Portugal correspondente a Nations League feminina obrigou a adiantar 24 horas a celebración do encontro da Primeira RFEF.
Xa o sábado, as cámaras da televisión autonómica estarán instaladas en Abegondo, coa celebración do derbi da Segunda RFEF entre o Fabril e o Bergantiños (17:00 h). Os dous conxuntos veciños teñen o mesmo obxectivo de entrar na fase de ascenso á Primeira RFEF. Na actualidade están separados por un punto e aínda faltan cinco xornadas para o remate da competición regular.
O domingo, a sesión matinal comeza ás 12:00 h co derbi galego da Primeira División de fútbol sala feminino desde o pavillón da Seca entre o Poio e o Ourense. Ás 14:00 h comezará a primeira manga do motocrós MXGP desde Sardeña, que volverá ter presenza ás 17:00 h, desta volta coa segunda manga. Desde as 18:00 h, o estadio do Couto albergará a cita da Primeira RFEF entre o Ourense C. F. e o Zamora, e ás 20:00 h pechará o calendario de retransmisións da fin de semana o Compostela-Salamanca, desde o estadio Vero Boquete, correspondente á Segunda RFEF.
En Xogo
O domingo pola noite, contra as 22:25 h, o equipo de ‘En Xogo’ resumirá todo o sucedido na fin de semana, con especial atención aos partidos Mallorca-Celta e Deportivo-Cádiz. Ademais, ofrecerá a última hora do Elxe-Rácing de Ferrol, programado para a noite do luns. Na segunda parte do programa estarán presentes todos os goles da xornada nas categorías da Primeira, Segunda e Terceira RFEF.