AGalega.gal ofrece este xoves á noite o partido de volta dos cuartos de final da Champions League de hóckey a patíns que disputan o Barcelos e o Liceo

Santiago, 03.04.2025.-    A Televisión de Galicia continúa cunha intensa semana chea de retransmisións deportivas. Despois do Celta-As Palmas, da Primeira División de fútbol, e do Villeneuve-Baxi Ferrol, da Eurocup de baloncesto feminino, chega a quenda para o hóckey sobre patíns. Este xoves, desde as 22:30 h, a plataforma AGalega.gal retransmite en exclusiva o partido de volta dos cuartos de final da Champions entre o Barcelos de Portugal e o Liceo da Coruña. O equipo que prepara Juan Copa chega a esta cita coa misión de remontar o 6-4 encaixado en Riazor no encontro de ida disputado a semana pasada.

O venres, a segunda canle da Televisión de Galicia abre a xornada futbolística da fin de semana desde o estadio municipal de Balaídos. Ás 20:30 h, o Celta Fortuna e o Barcelona B disputan un derbi de filiais, con urxencia para o segundo equipo azulgrá, obrigado a gañar para fuxir dos postos de descenso directo. Mentres, o cadro olívico acaba de sumar dúas vitorias consecutivas que lle permiten respirar na zona media da clasificación. A disputa o martes da próxima semana do España-Portugal correspondente a Nations League feminina obrigou a adiantar 24 horas a celebración do encontro da Primeira RFEF.

Xa o sábado, as cámaras da televisión autonómica estarán instaladas en Abegondo, coa celebración do derbi da Segunda RFEF entre o Fabril e o Bergantiños. Os dous conxuntos veciños teñen o mesmo obxectivo de entrar na fase de ascenso á Primeira RFEF. Na actualidade están separados por un punto e aínda faltan cinco xornadas para o remate da competición regular.

O domingo, a sesión matinal comeza ás 12:00 h co derbi galego da Primeira División de fútbol sala desde o pavillón da Seca entre o Poio e o Ourense. Ás 14:00 h comezará a primeira manga do motocrós MXGP desde Sardeña, que volverá ter presenza ás 17:00 h, desta volta coa segunda manga. Desde as 18:00 h, o estadio do Couto albergará a cita da Primeira RFEF entre o Ourense C. F. e o Zamora, e ás 20:00 h pechará o calendario de retransmisións da fin de semana o Compostela-Salamanca, desde o estadio Vero Boquete, correspondente á Segunda RFEF.

En Xogo

O domingo pola noite, contra as 22:25 h, o equipo de ‘En Xogo’ resumirá todo o sucedido na fin de semana, con especial atención aos partidos Mallorca-Celta e Deportivo-Cádiz. Ademais, ofrecerá a última hora do Elxe-Rácing de Ferrol, programado para a noite do luns. Na segunda parte do programa estarán presentes todos os goles da xornada nas categorías da Primeira, Segunda e Terceira RFEF.