A TVG celebra en Baiona o seu 40 aniversario cos participantes na VIG-BAY nacidos no 1985 - CRTVG
A TVG celebra en Baiona o seu 40 aniversario cos participantes na VIG-BAY nacidos no 1985
Vas correr na Medio Maratón Gran Bahía VIG-BAY e naciches no 1985? A TVG tamén. Amósanos o teu dorsal no noso stand en Baiona e leva un agasallo
O domingo, ás 10.00 h o programa ‘Galicia por diante’ da Radio Galega comezará as conexións coa proba, e máis tarde o ‘Galicia en goles, desde as 11:45 h
Santiago, 03.04.2025.- TVG segue a celebrar o seu 40 aniversario e este vindeiro domingo 6 de abril vai facelo na festa do atletismo galego, na VIG-BAY, a popular medio maratón que se disputa cada ano entre Vigo, Nigrán e Baiona.
Vas correr na Medio Maratón Gran Bahía VIG-BAY e naciches no 1985? A TVG tamén. Amósanos o teu dorsal no noso stand en Baiona e leva un agasallo. Na chegada da carreira, no parque da Palma de Baiona, TVG agardará os corredores que fan tamén 40 anos neste 2025 para entregarlles un agasallo.
Coma cada ano, a TVG e a Radio Galega informarán do medio maratón desde os seus informativos e espazos deportivos.
A Radio Galega estará en directo na carreira, coa narración do especialista Gonzalo Alonso, na meta de Baiona, e Rodrigo Pérez no estudio do espazo deportivo 'Galicia en Goles'; Anxo Suances, reporteiro do 'Galicia por diante', estará desde as 10:00 horas en meta, e no estudio do 'Galicia por diante’, Isabel Pichel. A TVG tamén atenderá, no tempo de Deportes, a proba que ten lugar entre a praia de Samil de Vigo e a vila de Baiona.