A Semana das Letras Galegas chega cargada de estreas exclusivas en AGalega.gal

Santiago, 12.05.2025.– A plataforma dixital AGalega.gal celebra as Letras Galegas 2025 coa estrea de contidos que poñen en valor a lingua, a identidade e a creatividade galega. Nesta semana especial, a oferta inclúe cinema premiado, concertos, documentais, series completas e espazos dedicados á cultura popular.

O mércores 14 chega unha das grandes novidades da semana: a serie documental ‘Non canto por cantare’, coas homenaxeadas nas Letras Galegas 2025 como protagonistas. A través delas técese unha historia sobre a transmisión e un relato colectivo sobre os sons tradicionais. ‘Non canto por cantare’ celebra o rexurdir da música popular nos torreiros do século XXI, conectando o pasado co presente. AGalega.gal oferta tamén o luns 12 o documental ‘A muller do eternauta’, que relata a vida e loita de Elsa Sánchez, viúva do escritor arxentino Héctor G. Oesterheld, desaparecido pola ditadura xunto coas súas fillas. Un testemuño de dor e esperanza, convertido nun símbolo da resistencia pacífica.

Os usuarios da plataforma AGalega.gal poderán gozar o xoves 15 da estrea de ‘EntreTerras’, o novo espectáculo de SonDeSeu, a única orquestra folk sinfónica do país. Nesta proposta vibrante e chea de luz, a música tradicional galega dialoga con outras sonoridades da península, celebrando a irmandade cultural ibérica.

A canle temática dedicada ás Letras Galegas, dispoñible durante un mes incluirá un carrusel especial con contidos como o documental ‘Pandeireitatok’, as series documentais ‘Se canto é porque quero’ e ‘Non canto por cantare’, o documental ‘Dorothè na vila’, o especial das Letras do Zigzag e o ‘Concerto das Letras’ do Consello da Cultura Galega. Estrearase tamén o programa dixital ‘Bótalle azucre’, e poranse a disposición todos os máis de 200 capítulos de ‘Alalá’, xunto coa Gala dos premios #DígochoEu 2025.

Cine e outros contidos

Desde o sábado 10 está tamén dispoñible a longametraxe ‘O corno’, a primeira película en galego que conseguiu a Cuncha de Ouro no Festival de San Sebastián. Dirixida por Jaione Camborda e participada pola TVG, está ambientada na Illa de Arousa dos anos 70. Narra a historia de María, unha mariscadora que tamén axuda nos partos con métodos tradicionais. Un suceso inesperado obrígaa a fuxir e atravesar a fronteira con Portugal por unha das rutas do contrabando. Estará dispoñible durante 30 días. Incorporouse tamén á plataforma a comedia francesa ‘Vacacións en África’, onde un grupo de celebridades viaxa a un recuncho remoto do continente como parte dun especial televisivo de Nadal. 

Outra estrea desta semana é a nova entrega de ‘Galician Friki’, programa centrado no fenómeno do cosplay e o K-pop, que nesta entrega se achega á creación de videoxogos, asiste á Lérez Up en Pontevedra e conta co creador de contidos Wismichu. E o primeiro episodio do docushow ‘Desafíos criminais’, que reconstrúe o secuestro do empresario Abel Diéguez en 2014, chega tamén a AGalega.gal

Por último, a serie ‘Punto Nemo’ chega ao seu desenlace coa estrea do último episodio. Todos os capítulos estarán dispoñibles durante 15 días. Ademais, lanzarase un novo capítulo do videopodcast ‘Satélite Xabarín’.