Novo éxito do 'DígochoEu', caso de estudo internacional esta semana no Consello de Europa - CRTVG
Novo éxito do 'DígochoEu', caso de estudo internacional esta semana no Consello de Europa
O xornalista Carlos F. Amado presentou en Estrasburgo a traxectoria do espazo e o seu papel dinamizador da lingua no público novo galego
Con case 500.000 seguidores entre TikTok e Instagram, ‘DígochoEu’ impacta moi especialmente cos seus vídeos diarios divulgativos do galego entre a mocidade galega e os neofalantes
Santiago, 20.11.2024.- Máis de 150 millóns de reproducións dos seus vídeos, 334.000 seguidores na conta de TikTok e 144 na súa conta de Instagram, as máis usadas pola cativada, e 10 millóns de likes nas publicacións. Estes son algúns dos datos que amosan o impacto do ‘DígochoEu’ na sociedade galega, tanto na comunidade coma no exterior.
O ‘DígochoEu’, que xa foi un caso de estudo no certame internacional de CIRCOM, a asociación de televisións rexionais europeas, foi tamén protagonista este martes en Estrasburgo ante o Comité de Expertos da Carta Europea das Linguas Rexionais ou Minoritarias, no Consello de Europa. Este comité é un organismo de expertos independentes encargado de supervisar a aplicación da Carta, a convención do Consello de Europa para a protección e promoción das linguas rexionais ou minoritarias.
O xornalista e creador do espazo, Carlos F. Amado, foi convidado a explicar neste foro europeo a orixe e evolución de ‘DígochoEu’ desde que comezou en xaneiro de 2020 ata a actualidade. Carlos Amado salientou que nestes “preto de cinco anos de vida, ‘DígochoEu’ segue a traballar pola lingua coa emisión de vídeos en galego editados nunha linguaxe visual e lingüística adaptada aos gustos e usos do público máis novo, unha das razóns do seu éxito”.
Presentado pola tamén xornalista Esther Estévez, ‘DígochoEu’ recibiu neste tempo destacados premios, como dous recentes Premio Mestre Mateo para Esther Estévez como mellor comunicadora, así como recoñecementos no eido da normalización lingüística en Galicia ou o Premio da Cultura Galega.
O Comité de Expertos da Carta Europea das Linguas Rexionais ou Minoritarias traballa seguindo o desenvolvemento e o crecente papel dos novos medios e as redes sociais, que contribúen ao uso e promoción das linguas rexionais, especialmente entre a mocidade, como é o caso do ‘DígochoEu’ da CRTVG.
Record de alcance de @g24noticias
‘DígochoEu’ é unha das canles dixitais da CRTVG, entre as que tamén destaca o proxecto dos servizos informativos @g24noticias que alcanzou os 102 millóns de visualizacións nos últimos 365 días e que chegou no último ano a 14 millóns de persoas na rede social Instagram, e ata 25 millóns na súa conta de TikTok, nun crecemento sostido que está a consolidar a cada vez maior presenza dixital dos servizos informativos da Galega como referentes da información.
@g24noticias ten presenza, ademais de en Instagram, en X, Facebook, TikTok e YouTube, e conta cunha canle de WhatsApp, ofrecendo un servizo integral en tempo real que completa a oferta informativa que supón o portal G24.gal.
